යාම යැදුම යනු කුමක්ද?
ඔබ සිතන ආකාරයට කතෝලික පියතුමෙකු දිනපතා ඉටු කිරීමට 'ණය යුක්තියෙන්' බැදී ඇති කාරණාව කුමක් විය හැකි ද? දිව්‍ය සත්ප්‍රසාද වහන්සේ බැහැදැකීම? ජපමාලය භාවනාව? ශුද්ධවූ පැය? මනෝමය යැදුම? එසේත් නැත්නම් ශුද්ධවූ දිව්‍ය පූජා යාගය ඔප්පු කිරීම?... මේ සියළු උපකල්පන සාවද්‍ය වේ. සියළුම කතෝලික පූජාප්‍රසාදීන් වහන්සේලා සාසන නීතිය තුළ දිනපතා ඉටු කිරීමට, 'ණය යුක්තියෙන්' බැදී ඇති යුතුකම නම් සාන්ත සභාවේ 'යාම යැදුම' නැතහොත් 'දේව රාජකාරිය' උච්චාරණය කිරීමයි. ඉංග්‍රීසි බසින් පිළිවෙලින් Liturgy of the Hours හා Divine Office ලෙස හැදින්වේ.
සාන්ත සභා මෑණියන් තම පූජක පුතුන්ට සිය ස්වාමියාණන්ගේ කල්වාරි යාගය දිනපතා සුපරිස්මරණය කිරීමට දයාබරව අනුශාසනා කළ ද, එසේම 'පූජාත්වරයෙන් තොර දිව්‍ය සත්ප්‍රසාදය ද, දිව්‍ය සත්ප්‍රසාදයෙන් තොර පූජාත්වරය ද පැවතිය නොහැකි' වුව ද, එය 'දිනපතා ණය යුක්තියක්' නොවේ. ඕනෑම කතෝලිකයෙකු යටත් වන 'ඉරුදිනත්, ණය මංගල දිනත් මුළු පූජා ආරාධනාවට සහභාගී වීමට' පමණක් පූජාප්‍රසාදීන් වහන්සේලා ද යටත් වේ. අවම වශයෙන් ඉරුදිනක වුව ද දිව්‍ය පූජාව සමරන්නට (celebration) හෝ හවුල් සැමරීමක් කිරීමට (concelebration) එතුමන්ලා බැදී නොසිටී. හුදෙක් ගිහියෙකු මෙන් දිව්‍ය පූජා යාගයට සහභාගී වීම පමණකදු සෑහේ.
කතෝලික සභා ඉතිහාසය තුළ නිල වශයෙන් නීති සංග්‍රහයන් ද්විත්වයක් නිකුත් වී ඇත. ඒ 1917 හා 1983 වර්ෂයන්හී දී ය. 1917 ට පෙර සභා නීතින් විවිධාකාර ප්‍රකාශන හා විවිධාකාර නිල ග්‍රන්ථ තුළ විසිරී තිබිණි. ඒ සියල්ල එක්කර 1917 දී ත්, නැවත එහි ප්‍රතිසංස්කරණය 1983 දී ත් නිකුත් විණි. වර්තමානයේ කතෝලික සභාවේ 'රෝමානු පිළිවෙතේ සභාව', එනම් අප මත, බලපවත්වන එකම නීතිය 1983 කතෝලික සභා නීති සංග්‍රහයේ සසුන් නීතිය යි. රෝමානු කතෝලික පූජාප්‍රසාදීන් වහන්සේලා කෙරෙහි බල පවත්වන 'යාම යැදුම' ණය යුක්තිය පිළිබදව මෙහි සුපැහැදිළිව සදහන් වන අතර, 1917 නීති සංග්‍රහය අනුව සාධාරණ හේතුවක් නොමැතිව යාම යැදුම් උච්ඡාරණය මග හැරීම කතෝලික පියතුමනට 'මරණීය පාපයක්' වන බව ද කිව යුතු ය.
1983 කතෝලික සභා නීති සංග්‍රහය 'ණය යුක්තීන්' පිළිබදව සදහන් කළ ද ඒවා ඉටු නොකිරීමෙන් අත්වන 'ආත්මික ඉරණම' සෑම තැන්හිම ඍජුවම සදහන් කර නොමැත. නිදසුනක් ලෙස කතෝලික අපගේ 'ඉරුදින ණය යුක්තිය' (Sunday Obligation) පිළිබදව සදහන් වුව ද එසේ නොකිරීමෙන් අත්වන 'මරණීය පාප' තත්වය පිළිබදව එය නිහඩ අතර අප එය දැන ගනුයේ 1917 සාසන නීති සංග්‍රහයෙන් එන සම්ප්‍රදායෙනි.
'කතෝලික පූජක දිවියේ නිරන්තර සගයා' (Perpetual Companion of Catholic Priesthood) බදු මේ' යාම යැදුම', පූජක හෝ පැවිදි නොවන ගිහි විශ්වාසකයින් අතරට නැවතත් රැගෙන යෑමේ කෘත්‍යය ආරම්භ කළේ දෙවන වතිකාන ජගත් මන්ත්‍රණ සභාව යි. එකී ජගත් කතිකාවතෙන් සාන්ත සභාවට බලපෑ යහපත් ප්‍රථිඵලයකි මෙය.
එසේ නම් කුමක් ද මේ 'යාම යැදුම' ?... ඉතා සරල පිළිතුර නම්, ගීතාවලියේ ගී 150 ප්‍රමුඛව අනෙකුත් ශුද්ධ බයිබලීය ගී හා පාඨයන් මුල් කරගෙන දිනපතා අවස්ථා 7 ක දී (හෝ 8 ක දී) සාන්ත සභාවේ දරුවන් ක්‍රිස්තුන් වහන්සේ තුළ හා ඔවුන් වහන්සේ තම අත්‍රින්ද්‍රීය අවයවයන් තුළ, ශුද්ධාත්මයාණන් වහන්සේගේ සහභාගීකමෙහි පියාණන් වහන්සේට අඛණ්ඩව තුති ප්‍රශංසා කිරීමත් මුළු විශ්වය වෙනුවෙන් මැදිහත් වීමත් ය.
ඒ ඒ දේශයන් තුළ රදගුරු මණ්ඩලය විසින් අනුමත කරන ලද නිල යාම යැදුම් ග්‍රන්ථ අනුසාරයෙන් සම්පූර්ණ හෝ තෝරාගත් යාම යැදුම් උච්ඡාරණයෙන් ඕනෑම කතෝලිකයෙකුට නිල දේව වන්දනාවේ සහභාගී වෙමින් තම යැදුම් දිවිය සාන්ත සභාවේ හද ගැස්මට එකතු කළ හැක. දිව්‍ය පූජා යාගයට පසු අති උත්තරීතර යැදුම නම් 'යාම යැදුම' යි. මන්ද යාම යැදුම නිල දේව වන්දනාවේම කොටසකි. (නිල දේව වන්දනාව: දිව්‍ය පූජාව සැමරීම, යාම යැදුම උච්ඡාරණය හා දේව ප්‍රසාද නිධාන/සක්‍රමේන්තු දානය/ලබා ගැනීම) දේව මාතාවන් වහන්සේගේ ශුද්ධ ජපමාලය භාවනා කිරීම ශ්‍රේණිගත වන්නේ නිල දේව වන්දනාවෙන් පසුවයි.
පහතින් දැක්වෙන්නේ කතෝලික සභාවේ රෝමානු පිළිවෙතේ යාම යැදුම් අවස්ථා (හෝරා) හතයි. 1970 හයවැනි පාවුළු පාප් වහන්සේ විසින් නිකුත් කළ 'ලෞදිස් කාන්තිකුම්' නම් අපෝස්තලික ව්‍යවස්ථාව මගින් මෙය මුළු රෝමානු කතෝලික සභාවටම අනුමත කරන ලදී.
උදා යාම යැදුම (Morning Prayer)
මැදි උදා යාම යැදුම (Midmorning Prayer)
මැදි දින යාම යැදුම (Midday Prayer)
මැදි දිවා යාම යැදුම (Midafternoon Prayer)
සැදෑ යාම යැදුම (Evening Prayer)
රාත්‍රී යාම යැදුම (Night Prayer)
කියැවීමේ යාම යැදුම (Office of Readings)
1970 ට පෙර පැවති 'පූර්ව රාත්‍රී යාම යැදුම' (Vigils/Nocturnes) හා 'ප්‍රයිම්' (උදා හා මැදි උදා යාම යැදුම අතර පැවති යාම යැදුම) ඉවත් කරන ලද අතර එහෙත් සිස්ටර්ෂියාන, කාතුසියාන වැනි 'නිරන්තර යැදුමේ තාපස නිකායන්හී' යම් යම් තාපසාරාම තුළ අදටත් මෙම ද්විත්වය ද සජ්ජායනය වේ.
අපෝස්තුළුවරුන්ගේ පටන් මුල් සියවස් පහ තුළ යාම යැදුම උච්ඡාරණය වූයේ හිබෘ, ඇරමයික් හා ග්‍රීක භාෂා වලින්, ජුදා තනු රටා වලට ය. ගීතාවලියේ ගීත ජෙරුසලම් දේව මන්දීරයේ ගැයි තනු වලටම ගායනා විය. මන්ද මේ යාම යැදුම් සම්ප්‍රදායේ උපත හමු වන්නේ ජුදා දහම තුළ යි. දිනකට සත් වරක් ගීතිකාකරු සමිදුන් පසසන බවට ගීතාවලියේ ගීත තුළින්ම එන සාක්ෂි අපට හමුවේ. එනමුදු සවැනි සියවසේ සිට 1970 දක්වාම යාම යැදුම උච්ඡාරණය වූයේ ලතින් බසිනි. ජුදා නාද රටාවන්ට සමීප ග්‍රෙගෝරියානු සජ්ජායනා සම්ප්‍රදාය, යාම යැදුම හා එක්විය. සතියක කාල පරිච්ඡේදය තුළ ගීතාවලියේ ගීතිකා 150 උච්ඡාරණය සම්පූර්ණ වන සේ අති සුවිශාල යාම යැදුම් සංග්‍රහයන් රචනා වූයේ මුද්‍රණ යන්ත්‍ර නොතිබුනු, සත්ව හම් මත සියල්ල රචනා වුණු මධ්‍යතන යුගයේ මුල් කාලයේ ය. පොතපත සීමිත වූ නිසාත්, භාෂා සාක්ෂරතාවය අවම මට්ටමක පැවති නිසාත් ක්‍රම ක්‍රමයෙන් මුළු සාන්ත සභාවටම පොදු මෙම යාම යැදුම, ගිහි විශ්වාසකයින්ගෙන් ඈත්ව පූජක හා පැවිදි ජීවිතයටම ආවේණික කෘත්‍යයක් විණි. රෝමානු කතෝලික සභාව තුළ, ලතින් බසින් පමණක් යාම යැදුම උච්ඡාරණය වීම ද ගිහි කතෝලිකයාගෙන් මෙම මහැගි යැදුම දුරස් වීමට හේතුවක් විණි.
එයට ආදේශකයක් ලෙස 'ස්වර්ගයේ වැඩ සිටින' හෝ 'නමෝ මරිය' යැදුම දිනපතා එකසිය පනස් වතාවක් උච්ඡාරණය වීම ආරම්භ විය. එය 'නූගතුන්ගේ යාම යැදුම' විය. 13 වැනි සියවසේ දී ශු. දොමිනික් ගුස්මාන් මුනිදුන්ට දේව මාතාවන් වහන්සේ එතුමියගේ ජපමාලය ප්‍රදානය කිරීමත් සමග එය ස්වර්ගීය අනුමැතිය ද ලද අතර, අප ස්වර්ගීය මෑණියන් එය හැදින්වූයේ 'මාගේ ගීතාවලිය' ලෙසයි. එනම් ජපමාලය නැතහොත් 'නූගතුන්ගේ යාම යැදුම' වනාහි ත්‍රිලෝක රාජේශ්වරියගේ, 'මරියාවන්ගේ ගීතාවලිය' යි (Marian Psalter).
දෙවැනි වතිකාන ජගත් මන්ත්‍රණ සභාවෙන් පසු සිදුවූ දේව වන්දනාව ස්වභාෂාකරණයේ ඵලයක් ලෙස හෙළ කතෝලිකයා විසින් එදා හැදින්වුනු "ස්වාමිගේ ඔෆිස් පොත" අද විවිධාකාර භාෂා වලට පරිවර්ථනය වී ඇති අතර ගිහි දේව ජනතාව ද ඉන් කොටස් හෝ පූර්ණ යාම යැදුම් සත උච්චාරණය කරති. දැනට ලංකාව තුළ සිංහල බසින් ඇත්තේ උදා හා සැදෑ යාම යැදුම් වලින් පමණක් සැදි, පොදු සති හතරේ චක්‍රය (Four Week Cycle) ඇති කුඩා යාම යැදුම සංග්‍රහයක් වුවත්, අප පූජාප්‍රසාදීන් වහන්සේලා හා ඒ ඒ තාපස හා පැවිදි නිකායන් වල සාමාජිකයින් යාම යැදුමේ අනුමත ඉංග්‍රීසි වෙළුම් හතරින් තම ණය යුක්තිය ඉටු කරයි. ශ්‍රී ලංකාවේ කතෝලික රාජගුරු මණ්ඩලය අනුමත කර ඇත්තේ ඇමරිකා එක්සත් ජනපදයේ අනුමත යාම යැදුම් වෙළුම් හතරයි. වෙළුම් තුනකින් සැදි 'බ්‍රිතාන්‍ය යාම යැදුම් සංග්‍රහය' අප දේශීය සභාව තුළ භාවිතයට ගත නොහැකි අතර, 16 වැනි බෙනඩික් සසුන් පියාණන් විශ්ව රෝමානු කතෝලික සභාවටම දානය කළ අනුමතිය අනුව ඕනෑම රෝමානු කතෝලික පියතුමෙකුට තම රුචිය අනුව රදගුරු තුමාගේ හෝ (නිකායික නම්) ශ්‍රේෂ්ඨ පියතුමාගේ විශේෂ අවසරයකින් තොරව, දෙවන වතිකාන ජගත් මන්ත්‍රණ සභාවට පෙර පැවති 1962 යාම යැදුම් වෙළුම් ද්විත්වය ආධාරයෙන් ද තම ණය යුක්තිය ඉටු කළ හැකි ය. (යාම යැදුම පමණක් නොව, තමන් සතුව ප්‍රමාණවත් දැනුමක් හා රුචියක් ඇත්නම් ඕනෑම රෝමානු කතෝලික පියතුමෙකුට පූර්ව දෙවන වතිකාන දිව්‍ය පූජා යාගය එනම් 'ත්‍රිදෙන්තීන දිව්‍ය යාගය' පැවැත්වීමේ අවසරය ද ඇත. එසේම නූතන දිව්‍ය යාගික පිළිවෙතම ද ලතින් බසින් හා ජනතාව සමග එක්ව ශ්‍රී කුරුසිය හා දිව්‍ය සත්ප්‍රසාද වහන්සේ දෙස බලා සිදු කිරීමේ හැකියාව ද පවතී.)
කැපවුණු සහෝදර තුමන්ලා හා කන්‍ය සොහොයුරියන් වෙසෙන පැවිදි හා තාපස නිකායන් තුළ 'යාම යැදුමේ ණය යුක්තිය' එක හා සමාන නොවේ. එහෙත් නිකායික පූජා ප්‍රසාදීන් වහන්සේලාට පොදුවේ සෑම රෝමානු කතෝලික පූජාප්‍රසාදී තුමෙකුටම හිමි 'යාම යැදුමේ ණය යුක්තිය' බලපැවැත්වේ. නිදසුනක් ලෙස පැය විසි හතරින් පැය 12ක් හෝ ඊටත් වැඩියෙන් ක්‍රියාකාරී යොවුන් සේවාවල නිරත වන දොන් බොස්කෝ සැලේසියාන නිකායික සහෝදර තුමන්ලාට එය කිසිසේත් අදාළ නොවන වගකීමකි. එහෙත් එම නිකායේම පූජාප්‍රසාදීන් වහන්සේලා 'යාම යැදුමේ ණය යුක්තියෙන්' බැදී සිටිති. සිස්ටර්ෂියාන තාපස නිකායේ අධ්‍යත්මය, එනම්, 'යැදීම හා වැඩ කිරීම' තුළ එහි පියතුමන්ලා හා සහෝදරතුමන්ලා සියල්ලෝම, සෑම යාම යැදුම හෝරාවක්ම සම්පූර්ණයෙන් ඉටු කිරීමට 'බෙනදිකාන නීතිය' (Rule of St. Benedict) යටතේ බැදී සිටී. සිස්ටර්ෂියාන පියතුමන්ලා සභා නීති සංග්‍රහය (Code of Canon Law) තුළ ද එයට බැදී ඇත.
අපෝස්තලික කාර්මේල් කන්‍ය සොහොයුරියන් ක්‍රියාකාරී දේව සේවයේ නිරත බැවින් යාම යැදුම ඔවුන්ගේ නීති සංග්‍රහය තුළ විශේෂ ස්ථානයක් නොදරන නමුත් තාපසික කාමලයිට් කන්‍ය සොහොයුරියන්, ජපමාල තාපස සොහොයුරියන් වැනි තාපස කාන්තා නිකායන් තම පැවැත්මේ අග්‍රස්ථානය ලෙස මෙම නිරන්තර යැදුම තබා ගනී. දිව්‍ය සත්ප්‍රසාද වහන්සේ ඉදිරිපිට නිරන්තර වන්දනාව සමග ජපමාල යැදුමේ යෙදෙන මෙතුමියන් 'සාන්ත සභාවේ නිල යාම යැදුම' ද සම්පූර්ණයෙන් පාහේ ඉටු කිරීමට තම මුළු ජීවිතයම කැප කර ඇත. සයුරු හතක් එපිට දුෂ්කර දේශයන් තුළ මිෂනාරී පියතුමන්ලා කරන සේවයට, අනාථ-අසරණ-දුබල-මහළු-දුගී සියල්ලන්ට සිදු කෙරෙන සියළු කතෝලික ක්‍රියාකාරී දේව සේවයට හා මීසම් භාර පියතුමන්ලාගේ ආත්ම ගැළවීමේ සක්‍රමේන්තුමය සේවයට, අත්‍යවශ්‍ය ශක්තිය සපයන 'කිතු සසුනේ ශක්ති බලාගාර' (Power Plants of the Catholic Church') මෙම නිරන්තර යැදුමේ තාප නිකායන් ය. ජීවී සෛලයකට මයිටකොන්ඩ්‍රියම කෙසේද සාන්ත සභාවට තාපස හා නිරන්තර යැදුමේ නිකායනුත් එලෙසම ය.
යාම යැදුමේ ණය යුක්තිය තුළ රෝමානු කතෝලික පියතුමෙකු වර්තමාන යාම යැදුම් හෝරා සතෙන් පහක් උච්චාරණය අනිවාර්ය වේ. මේ යාම යැදුම් 'හෝරා' ලෙස හැදින්වුව ද එක් යාම යැදුමක් අවම දේව වන්දනා නීති සපුරාලමින් උච්චාරණයට ගත වන්නේ උපරිම පැය කාලක වේලාවකි. 'කියැවීමේ යාම යැදුම' (Office of Readings) දේව වන්දනා දිනය හා කාලය අනුව සැදි ශුද්ධ ලියැවිලි පාඨයකින් හා බොහෝ විට සභා පියෙකුගේ ලියැවිලි උපුටනයකින් සැදි නිසා මිනිත්තු 20ක් පමණ දීර්ඝ වේ. සජ්ජායනය හෝ ගායනය අත්‍යවශ්‍ය නොවේ. එහෙත් අවම ලෙස උච්ඡාරණය කරන වචන අනුව දෙතොල් හැසිරවිය යුතුය. සිටගෙන, අසුන්ගෙන, දණගසාගෙන හෝ වැතිරී වුව ද උච්ඡාරණය කළ හැක. එහෙත් අවධානය තබා ගත යුතු ය. ලතින් බසින් උච්ඡාරණයේදී වදනින් වදන තේරුම් ගැනීම අනවශ්‍යය වුව ද, 'සභාව ඉටු කිරීමට අදහස් කරන දේ ඉටු කිරීම' (doing what the Church intends to do) යන්න සිත්හි තබා ගැනීම ප්‍රමාණවත් ය. මීළග කාරණාව නම් එම 'අනිවාර්ය යාම යැදුම් පහ' (Five Obligatory Offices/Hours) හැදිනීමයි. ඒවා නියමිත වේලාවන් සමග පහත දැක්වේ.
- උදා යාම යැදුම (හිමිදිරියේ සිට පෙ.ව. 9 දක්වා අතර උච්ඡාරණය කළ හැක.)
- සැදෑ යාම යැදුම (හිරු බැස්මත් සමග)
- රාත්‍රී යාම යැදුම (රාත්‍රී නින්දට පෙර)
- කියැවීමේ යාම යැදුම (දවසේ ඕනෑම වේලාවක හෝ 1962: උදා යාම යැදුමට පෙර)
- දිවා යාම යැදුම් තුනෙන් එකක්:
එනම්,
- මැදි උදා යාම යැදුම නම් පෙ.ව. 9 ත් ප.ව. 12ත් අතර
- මැදි දින යාම යැදුම නම් ප.ව. 12 ත් ප.ව. 3 ත් අතර
- මැදි දිවා යාම යැදුම නම් ප.ව. 3 ත් ප.ව. 6ත් අතර
යාම යැදුම් හෝරාවන්ගේ උච්ඡතම හෝරා නම් උදා යාම යැදුම හා සැදෑ යාම යැදුම යි. ආරම්භක ගීතයකින්, ගීතාවලියේ ගී ද්විත්වයකින්, ශුද්ධ ලියැවිලි ගීයකින්, නව ගිවිසුම් දේව වාක්‍ය පාඨයකින්, පිළිතුරු ගීයකින්, මරිය උදාන ගීය හෝ සෙකරියස් ගේ උදාන ගීයෙන් හෝ සිමියොන්ගේ උදාන ගීයෙන්, දේව ජනතාවගේ අයැදීම් වලින් හා ස්වාමිවාක් ආරාධනයෙන් සැදි මූලික යාම යැදුම් හෝරාවක් අවසාන වන්නේ දිනට හා හෝරාවට නියමිත කෙටි යැදුමකිනි. එය බොහෝ විට රෝමානු දිව්‍ය පූජා සංග්‍රහයේ දිනට නියමිත පූජා පිළිවෙතේ 'ආරම්භක යැදුම' (පොදු යැදුම) වේ. "වෙස්ප'ස්" කියා ලතින් බසින් හදුන්වන්නේ සැදෑ යාම යැදුම යි. එසේ නම් මීසමේ ආරක්ෂක ශුද්ධවරයාගේ මංගල දිනට පෙර සන්ධ්‍යවේ අප සහභාගී වන්නේ සභා මෑණියන් දිනපතා ස්වර්ගයට ඔසවන මෙම යාම යැදුමේ එම' ශුද්ධවරයාගේ මංගල්‍යයට නියමිත පෙර දින සැදෑ මෙහෙයට' යි (Evening Prayer I).
ගීතාවලියේ ගීත ජේසු ස්වාමින් වහන්සේ පිළිබදව පෙර සළකුණු ය (pre-figurations). ඒ සියල්ල ඔවුන් වහන්සේගේ ආගමනය සමග ඉෂ්ඨ විය, පාස්කු අභිරහසින් සම්පූර්ණත්වය ලැබීය. එම නිසාම ගීතාවලිය හදවත කොටගෙන යදින යාම යැදුම සැබෑ 'සන්ධ්‍ය පූජාවකි',' පාස්කු අභිරහස සැමරීමකි'. සංඝයක් එක්ව සමරන ගාම්භීර යාම යැදුමකදී 'දෙව් මව් උදාන ගීය' ගායනයේදී සියල්ලෝ නැගී සිටින්නේ, දිව්‍ය පූජාවේ සුභාරංචි ප්‍රකාශනයට නැගී සිට කරන ගෞරවය පිදීමට යි. ඒ මොහොතේ දී මුලසුනේ පූජාප්‍රසාදී තුමා පූජාසනය වටා ගමන් කරමින්, ඊට හා ශ්‍රී කුරුසියට සුවද දුම් පූජා කරයි. උදා, සැදෑ හා රාත්‍රී යන ප්‍රධාන යාම යැදුම් ත්‍රිත්වයටම ආවේණික සුභාරංචි ගී ඇත. ඒවා මෙසේය:
- උදා යාම යැදුම : බෙනෙදික්තුස් (සෙකරියස් තුමන්ගේ උදාන ගීය)
- සැදෑ යාම යැදුම : මග්නිෆිකාත් (දෙව් මව් උදාන ගීය)
- රාත්‍රී යාම යැදුම: නුන්ක් දිමිත්තුස් (සිමියොන්ගේ උදාන ගීය)
80 හා 90 දශක තුළ කොරියාවේ, නාජු නම් නගරයේ සිදුවූ දෙව් මව් දර්ශන මාලාවක් පිළිබදව ඔබ අසා ඇති. එය තවමත් සාන්ත සභාවේ නිල අනුමැතිය නොලැබී ඇති දර්ශනයක් වුව ද පදවියේ රදගුරු තුමන් එහි වන්දනා ගමන් පැවැත්වීමට අවසර ලබා දී ඇත. ජුලියා කිම් නම් විවාහක තරුණිය කේන්ද්‍ර කරගෙන සිදුවූ අධිස්වාභාවික පෙළහර අතර දිව්‍ය සත්ප්‍රසාදය මාංශ ලේ බවට හැරවෙන සිදුවීම් හා දෙව් මව් ප්‍රථිමාවකින් ලේ කදුළු ගලා ආ අවස්ථා වාර්තාගතව ඇත. දෙවන ජුවාම් පාවුළු පාප් වහන්සේ ඉදිරිපිටම, ජුලියා ගේ මුව රැදී පූපයෙන් ලේ ගැලීම වැනි පෙළහර මධ්‍යයේ පණිවිඩ රාශියක් ද දේව මාතාවන් වහන්සේ ඇයට ලබා දී ඇත. එහිදී, දේව මාතාවන් වහන්සේ ඉතා කණගාටුවූ කරුණක් නම් පූජාප්‍රසාදීන් වහන්සේලා ඇල්මැරුණු ස්වභාවයෙන් මේ සුපරිශුද්ධ යාම යැදුම් සිදු නොකර තම 'දේව රාජකාරිය' පැහැර හැරීමයි. යාම යැදුම හා පූජක අධ්‍යත්මය අතර නොබිදිය හැකි සබදතාවයක් ඇති අතර එය පළුදු වන තැන යක්ෂයා ක්‍රියාත්මක වීමට ගන්නා මොහොත බව බොහෝ ආත්මික විශාරදයින්ගේ ඉගැන්වීම යි. 'නොකඩවා යදින්න' ලෙස අප ස්වාමින් වහන්සේ දුන් ඒ නියෝගයට සාන්ත සභාව පිළිතුරු දෙන ප්‍රධානතම ආකාරය අඛණ්ඩ යාම යැදුමේ නිරත වීම යි. තේවාචාර්ය තුමන්ලාගේ සිට සුදතුම් පියාණන් දක්වා සමිදාණන්ගේ පූජකවරයේ සහභාගී වන සියල්ලෝ, දිවි හිමියෙන් මුළු ලොව වෙනුවෙන් මැදිහත් යැදුමේ යෙදෙන්නට කැප වෙති.
ඉංග්‍රීසි බසින් ප්‍රකාශිත යාම යැදුම සංග්‍රහයේ වෙළුම් හතරේ සාරය බදු සති හතරක් දිවෙන ගීතාවලියේ ගීතිකා 150 ඇතුළත් සිංහල සංක්ෂිප්ත යාම යැදුම පොත අගරදගුරු පදවි දේව වන්දනා කොමිසම මගින් හෙළි දැක් වූයේ මීට වසර 15 කට පමණ පෙරයි. අද වන විට යම් යම් දේවස්ථාන වල දිනපතා දිව්‍ය යාගයට පෙර යාම යැදුම ගිහි දේව ජනතාව එකතු වී සිදු කිරීම ද ප්‍රශංසනීය යි. උදා: සිංහල බසින් වික්ෂෝප දේව මාතා දෙව් මැදුර, ජාඇල, ඉංග්‍රීසි බසින් දිව්‍ය සත්ප්‍රසාද වහන්සේගේ නිකායේ, ශු.පිලිප් නේරි මුනිදුන්ගේ දෙව් මැදුර, කොටුව.
ගිහි විශ්වාසකයින්ගේ දෑතට යාම යැදුම ලබා දීම දෙවන වතිකාන ජගත් මන්ත්‍රණ සභා පියවරුන්ගේ සිහිනයක් විය. එය සිහිනයක්ම නොව යතාර්ථයක් බවට පෙරළා ඉන් ලැබෙන අසංඛ්‍යත ආත්මික වරප්‍රසාද වලින් සාන්ත සභාවත් මුළු ලොවත් සන්නද්ධ කිරීමට කාලය එළැබ ඇත. දෙවන වතිකාන ජගත් මන්ත්‍රණ සභාවේ පියවරුන් නිකුත් කළ ප්‍රකාශන දහසයෙන් කිසිදු ස්ථානයක සදහනක් නොමැති ශුද්ධවූ දිව්‍ය සත්ප්‍රසාද වහන්සේ සැදහැවතුන්ගේ දෝතට ලබා දීම වැනි නව්‍යකරණයන් පවා යතාර්ථයක් වී ඇති යුගයක එකී ජගත් මන්ත්‍රණ සභාව සුපැහැදිළිව සදහන් කරන ප්‍රතිසංස්කරණ ඉවත දැමීම යුතු නොවේ. එය ශුද්ධවරුන්ගේ සමාගමයට එක්වී ඇති 23 වැනි ජුවාම් හා 6 වැනි පාවුළු ශුද්ධවූ සනුනිසුරාණන් වහන්සේලාට ද අප කරන නිගාවකි.
එමනිසා ගිහි දේව ජනතාවක් ලෙස පෞද්ගලික මට්ටමින් ආරම්භකර පසුව මීසම්, යැදුම් කණ්ඩායම් හා ආත්මික සංවිධාන දක්වා යාම යැදුමේ ස්ප්‍රීතුව රැගෙන යාමට අපි වෙර දරමු. ඒ සමගම සියවස් ගණනක් පුරාවට දේව ජනතාවගේ යාම යැදුම වූ 'මරියෝත්තමාවන්ගේ ගීතාවලිය' ද නොවරදවා භාවනා කරමින් උච්ඡාරණය කරමු. සභා සම්මත දේව මාතා දර්ශන සියල්ල අපට ආරාධනා කරන්නේ ශුද්ධ ජපමාලය උච්චාරණයට යි. එහෙයින් ගිහියන් ලෙස අපගේ යැදුම් දිවියේ 'ප්‍රමුඛස්ථානය' ශුද්ධ ජපමාලයට ලබා දී ඉන් පසුව, කාල-කලමනාකරණය තුළ, පවුලක් ලෙස අවම වශයෙන් උදෑසන හා රාත්‍රී යාම යැදුම්වත් උච්ඡාරණය කිරීමට අදිටන් කර ගනිමු. ජේසු පිහිටයි!
දෙවියනී මාගේ සහයට වැඩිය මැනව!
ඔබගේ ශුද්ධවූ උපකාරය කඩිනම් කළ මැනව!
පිතා, පුත්‍රයා, ස්ප්‍රීතු සාන්තු නම් ත්‍රීත්ව ඒක දේවෝත්තමයාණන්ට ස්තෝත්‍ර වේවා!
ආදියේ වූවාක් මෙන්, දැනුත්, නිතිපතාත්, අනන්ත කාලයක් වේවා!
ආලේලුයියා!
සටහන ලක්ෂාන් ෆොන්සේකා
