මළවුන් වෙනුවෙන් ජපමාලය හා ප්‍රාර්ථනාව
මළවුන්ගේ ජපමාලය
පිතාගෙත් පුත්‍රයාගෙත් ස්ප්‍රිතු සන්තුගෙත් නාමයෙන් ආමෙන්.
කුරුසියට
ජේසු තුමන්ගේ ශ්‍රී හර්දයෙනි මම ඔබ කෙරෙහි විශ්වාස කරමි
ලොකු ඇටය සදහා
(ස්වර්ගයේ වැඩට සිටින යැදුම වෙනුවට)
(පන්තියකට පසු එන ඇටය)
මූලික - ජේසු තුමන්ගේ මධූරවූ හර්දයෙනි,
සෙසු - ඔබ මාගේ ආදරය වේවා
මූ - මරිය තුමන්ගේ මිහිරිවූ හර්දයෙනි සෙසු- ඔබ මාගෙ ගැලවීම වේවා
මූලිකයා - අහෝ මගේ දෙවියනි , ඔබ සත්‍ය බැවින්
සෙසු අය - මම ඔබ කෙරෙහි විශ්වාස කරමි. මූ- ඔබ පොරොන්දු සම්පූර්ණ කරන බැවින්
සෙසු - ඔබ කෙරෙහි බලාපොරොත්තු වෙමි
මූ - ඔබ අනන්ත දයා යහපතානන් බැවින් සෙසු -ඔබ සියළු දේට වැඩිය ඔබට දයා වෙමි...
කුඩා ඇට පනස් තුන සදහා
(නමෝ මරිය යැදුම වෙනුවට)
මූලිකයා - ජේසුනී මරියනී
සෙසු- ජේසු මරිය ජුසේ තුමෙනි
ජපමාලය අවසානයේ - ජේසු මරිය ජුසේ මාගේ හර්දයත් ජීවිතයත් ආත්මයත් ඔබ වහන්සේලාට ඔප්පු කරමි.
ජේසු මරිය ජුසේ මාගේ මරණාසන්නයේදී ඔබ වහන්සේලා මට පිහිටවුව මැනව.
ජේසු මරිය ජුසේ මා ඔබවහන්සේලා ඉදිරියේ සමාදානයේ නැසීයාමට සැලැස්සුව මැනව
මළවුන්ගේ ප්‍රාර්ථනාව
මෙම ප්‍රාර්ථනාව මළාවූ අය උදෙසා කරන ප්‍රාර්ථනාවයි. මෙය ‘මරණාසන්න අය සඳහා ප්‍රාර්ථනාව’ හෝ ‘මරණයට පත්වූ විගස කරන ප්‍රාර්ථනාව’ නොවේ. රෝගී වූ විට, මරණාසන්න වූ විට, අවසන් හුස්ම හෙළීමට ආසන්න වූ විට, අවසන් හුස්ම හෙලූ විගස යන මෙම විවිධවූ අවස්ථාවන් සඳහා වෙනමම යාච්ඤා හා ප්‍රාර්ථනාවන් ඇත.
මෙම ප්‍රාර්ථනාව සජ්ඣායනා කිරීම සඳහා මළාවූ පුද්ගලයන් හෝ පුද්ගලයා, බෞතීස්මය ලැබූ අයෙක් විය යුතුය. බෞතීස්මය නොලැබූ එහෙත් ධර්මාපේක්ෂකයෙක් වන අයෙක් නම් ඔහු උදෙසා ද මෙය කිව හැකිය.
බෞතීස්මය නොලැබූ ධර්මාපේක්ෂකයෙක් ද නොවන අයෙක් නම්, ඔහු හෝ ඇය දේව කරුණාවට බාර කොට යාච්ඤා කිරීම සිදුකළ හැකිය.
එසේම මෙය සජ්ඣායනා කිරීම සඳහා මළාවූ පුද්ගලයන් හෝ පුද්ගලයා පුණු විය (සාසන නීතියට අනුව අවුරුදු 07) සම්පූර්ණ කළ අයෙක් විය යුතුය. මිය යන විට අවුරුදු 7 සම්පූර්ණ නොවූ (එනම් 7 වන උපන් දිනය ලබන දිනයට පෙර මියගිය) දරුවන් වෙනුවෙන් කීම සඳහා ගිහියන්ට වෙනමම යාච්ඤා හා ප්‍රාර්ථනාවන් ඇත.
මෙය සාමාන්‍යයෙන් ලියා තබනුයේ සියලු මළාවූ අය උදෙසා කියනු ලබන පොදු යාච්ඤාවක් ලෙසය. එබැවින් මෙය ඔවුන්ට, ඔවුන් නිසා යන වචන යොදා ලියා ඇත. එහෙත් නිශ්චිත අයවලුන් හෝ අයෙක් සඳහා හෝ මෙය කිව හැකිය. එසේ කියනා විට සුදුසු පරිදි වචන වෙනස් කරගත හැකිය.
පොදුවේ කියනු ලබන්නේ නම් : ඔවුන්ට, ඔවුන් නිසා
නිශ්චිත අයවලුන් සඳහා කියනු ලබන්නේ නම් : ඔවුන්ට, ඔවුන් නිසා
එක් අයෙක් උදෙසා කියනු ලබන්නේ නම් : ඔහුට, ඔහු නිසා හෝ ඇයට, ඇය නිසා
මෘත දේහ (හෝ මෘත දේහය) අසළදී කියනු ලබන්නේ නම්: මොහුට, මොහු නිසා, මැයට, මැය නිසා, මොවුන්ට, මොවුන් නිසා
මෙහි පදය ලා පැහැති අකුරෙන්ද, ඊට පිළිතුර පදය තද පැහැති අකුරෙන්ද ඉදිරිපත් කර ඇත. පිරිසක් සිටී නම්, එම සිටිනා අය කොටස් දෙකකට බෙදී හෝ, මූලිකයෙක් හා සෙසු පිරිස ලෙස හෝ, කියවීම හෝ සජ්ඣායනය කිරීම සිදුකළ හැකිය. තනිවම යාච්ඤා කරන්නේ නම් මෙම කොටස් දෙකම තනි පුද්ගලයෙක් විසින් කීම හෝ සජ්ඣායනය කිරීම සිදුකළ හැක.
සාමාන්ය සාන්තුවර ප්‍රාර්ථනාවක මෙන් නොව, මේ ප්‍රාර්ථනාවේ මෙයටම ආවේණික ශෛලියක් ඇත. බහුතර කොටස් ‘පදය හා පිළිතුරු පදය’ ලෙස දෙපිරිසක් විසින් සජ්ඣායනය කරනු ලබන අතර, සමහර කොටස් සැවොම එකට සජ්ඣායනය කරනු ලබයි.
මෙම යාච්ඤා ගිහියන් විසින් සජ්ඣායනය කිරීම පිණිස, ශ්‍රී ලංකාවේ කතෝලික සභාව විසින් තනා ගෙන ඇති යාච්ඤාවන් මිස, නිළ දේව වන්දනා පිළිවෙත්වලට අයිති යාච්ඤාවන් නොවේ. එබැවින්, ප්‍රාදේශීයව මෙම ප්‍රාර්ථනාවේ කොටස් වෙනස් විය හැකිය (උදා: පුනරුක්ති ඇති ස්ථාන, සාන්තුවරයන් ප්‍රමාණය හෝ අනුපිළිවෙළ ආදී). දේව වන්දනාවේ යාච්ඤා වෙනස් කළ නොහැකි වුවද, මෙම යාච්ඤාවන් ප්‍රාදේශීය ලෙස වෙනස් වී තිබීමේ කිසිඳු වරදක් නැත.
ස්වාමිනි ඔවුන්ට / කරුණාකළ මැනව
ස්වාමිනි ඔවුන්ට / කරුණාකළ මැනව
ක්‍රිස්තුනි ඔවුන්ට / කරුණාකළ මැනව
ක්‍රිස්තුනි ඔවුන්ට / කරුණාකළ මැනව
ස්වාමිනි ඔවුන්ට / කරුණාකළ මැනව
ස්වාමිනි ඔවුන්ට / කරුණාකළ මැනව
ක්‍රිස්තුනි ඔවුන්ගේ දුක් / බැලුව මැනව
ක්‍රිස්තුනි ඔවුන්ගේ දුක් / බැලුව මැනව
ක්‍රිස්තුනි ඔවුන්ගේ හඬ / ඇසුව මැනව
ක්‍රිස්තුනි ඔවුන්ගේ හඬ / ඇසුව මැනව
පහත කොටස් සඳහා පිළිතුරු පදය : ඔවුන්ට දයා / කළ මැනව
පරමණ්ඩලවල වැඩසිටින / පිතාවන දෙවියනි,
ලෝකය නිදහස් කළා වූ / පුත්‍ර වන දෙවියනි,
ස්ප්‍රීතු සාන්තු වන / දෙවියනි,
සුපරිශුද්ධ ත්‍රිත්වය වූ / ඒක දෙවියනි,
පහත කොටස් සඳහා පිළිතුරු පදය : ඔවුන් නිසා / යාච්ඤා කළ මැනව
ශුද්ධවූ / මරියනි,
ශුද්ධවූ / දේව මෑණියනි,
කන්‍යාති / කන්‍යාවෙනි,
ශුද්ධවූ මිඛායෙල් / අග්‍රදූතයෙනි,
ශුද්ධවූ සියලු / දේවදූතවරුනි,
මෝක්ෂසම්පන්නවූ, ශුද්ධවූ සියලු සුරතාවයන්ගේ පන්ති / සියල්ලෙනි,
ශුද්ධවූ / ස්නාවක ජුවාම් මුනිඳුනි,
ශුද්ධවූ / ජුසේ මුනිඳුනි,
ශුද්ධවූ සියලු ආදිපිතෘවරුන් හා / දිවස්ප්‍රසාදිවරුනි,
ශුද්ධවූ පේදුරු හා / පාවුලු මුනිවරුනි,
ශුද්ධවූ / ජුවාම් මුනිඳුනි,
ශුද්ධවූ සියලු අපෝස්තුළුවරයන් හා / සුවිශේෂකවරුනි,
ශුද්ධවූ / ස්තේපන් මුනිඳුනි,
ශුද්ධවූ / ලෞරෙන්ති (ලෝරන්ස්) මුනිඳුනි ,
ශුද්ධවූ සියලු / ප්‍රාණපරිත්‍යාගිවරුනි,
ශුද්ධවූ / ග්‍රිගෝරියස් (ග්‍රෙගරි) මුනිඳුනි,
ශුද්ධවූ / අම්බ්‍රෝසි මුනිඳුනි,
ශුද්ධවූ / අගුස්තීනු මුනිඳුනි,
ශුද්ධවූ / ජෙරොම් මුනිඳුනි,
ශුද්ධවූ / බෙනඩික් මුනිඳුනි,
ශුද්ධවූ ෆ්‍රැන්සිස් හා / දොමිනික් මුනිවරුනි,
ශුද්ධවූ / ජෝන් මේරි වියානි මුනිඳුනි,
ශුද්ධවූ / ෆ්‍රැන්සිස් සවියේර් මුනිඳුනි,
ශුද්ධවූ සියලු රාජගුරුප්‍රසාදිවරුන් හා / වන්දනාවාදිවරුනි,
ශුද්ධවූ සියලු / ආගම පණ්ඩිතවරුනි,
ශුද්ධවූ සියලු පූජාප්‍රසාදිවරුන් හා / තේවාචාර්යවරුනි,
ශුද්ධවූ සියලු තපස්වරුන් හා / ආරණ්‍යවාසිවරුනි,
ශුද්ධවූ / මරිය මග්දලේනා මුනිවරියනි,
සියන්නාවේ ශුද්ධවූ / කතරිනා (කැතරින්) මුනිවරියනි,
ශුද්ධවූ / බාර්බරා මුනිවරියනි,
ශුද්ධවූ / උර්සුලා මුනිවරියනි,
ජේසු සමිඳුන්ගේ ශුද්ධවූ / තෙරේසා මුනිවරියනි,
ශුද්ධවූ සියලු කන්‍යාස්ත්‍රීන් හා / විධවියෙනි,
ඉහත සඳහන් කළ සාන්තුවරුන් අතර, ඔබ සිහිපත් කරන මළාවූ අයගේ නාම සාන්තුවරුන් සිටියේ නැතිනම් හෝ, ඔහු/ඇය/ඔවුන් හට තව නාම සාන්තුවරු ඇතිනම්, එම කලින් සඳහන් නොවූ සාන්තුවරයන් සියලුදෙනාගේ නම් පහතින් එකතුකළ හැකිය. මෙය අනිවාර්ය නොවේ. අවශ්‍යතාව අනුව කළ හැකිය.
ශුද්ධවූ (නාම සාන්තුවරයාගේ/වරියගේ නම) මුනිඳුනි/මුනිවරියනි,
ඔවුන් නිසා / යාච්ඤා කළ මැනව
ඉහත සඳහන් කළ සාන්තුවරුන් අතර, ඔබ සිහිපත් කරන මළාවූ අය අයිති දේවස්ථානයෙහි, ප්‍රදේශයෙහි හෝ රටේ කැපකර තිබෙන සාන්තුවරු සඳහන් නොවුනේ නම්, එම එම කලින් සඳහන් නොවූ සාන්තුවරයන් සියලුදෙනාගේ නම් ද පහතින් එකතුකළ හැකිය. මෙය ද අනිවාර්ය නොවේ. අවශ්‍යතාව අනුව කළ හැකිය.
ශුද්ධවූ (දේවස්ථානය, ප්‍රදේශය කැපකර ඇති සාන්තුවරයාගේ/වරියගේ නම) මුනිඳුනි/මුනිවරියනි,
ඔවුන් නිසා / යාච්ඤා කළ මැනව
ශ්‍රී ලංකාවට සම්බන්ධ අයෙකු නම්
ශුද්ධවූ / ජුසේ වාස් මුනිඳුනි,
ඔවුන් නිසා / යාච්ඤා කළ මැනව
දෙවියන්ගේ සියලු ශුද්ධවන්තයන් හා / ශුද්ධවන්තියනි,
ඔවුන් නිසා / යාච්ඤා කළ මැනව
ප්‍රසන්නව
ඔවුන්ගේ පව් / ක්ෂමා කළ මැනව
ප්‍රසන්නව
අපේ ප්‍රාර්ථනා ඇසුව මැනව / ස්වාමිනි
පහත කොටස් සඳහා පිළිතුරු පදය:
ඔවුන් ගළවා ගත මැනව / ස්වාමිනි
සියලු / නපුරෙන්,
ඔබවහන්සේගේ / උදහසින්,
ඔබවහන්සේගේ නීතියෙහි / අමාරුකමින්,
යක්ෂයාගේ / බලයෙන්,
සිත් හාරන / කෘමියාගෙන්,
නිත්‍ය / කාංසාවෙන්,
කඨූර වූ / ගිනි ජ්වාලවලින්,
ඉවසිය නොහැකි / සීතලෙන්,
භ්‍රාන්තික / කළුවරෙන්,
භයංකර ඇඬුම් / විලාපයෙන්,
ඔබවහන්සේගේ ආශ්චර්යමත් වූ / ගර්භවාසය බලා,
ඔබවහන්සේගේ ශුද්ධවූ / උපත බලා,
ඔබවහන්සේගේ අතිමධුර වූ / නාමය බලා,
ඔබවහන්සේගේ ප්‍රසාද ස්නාපනය හා ශුද්ධවූ / නිරාහාරවීම බලා
ඔබවහන්සේගේ අතිගැඹුරු වූ / බැහැපත්වීම බලා,
ඔබවහන්සේගේ යුහුසුලු / කීකරුවීම බලා,
ඔබවහන්සේගේ අප්‍රමාණ / දයාප්‍රේමය බලා,
ඔබවහන්සේගේ චිත්තශෝක / වේදනාව බලා,
ඔබවහන්සේගේ රුධිරය හා / දහඩිය බලා,
ඔබවහන්සේගේ / සිරගතවීම බලා,
ඔබවහන්සේගේ / කසපහර විඳීම බලා,
ඔබවහන්සේගේ කටු ඔටුන්න / පැළඳවීම බලා,
ඔබවහන්සේගේ කුරුසය උසුලාගෙන / යාම බලා,
ඔබවහන්සේගේ අති කඨූර වූ / මරණය බලා,
ඔබවහන්සේගේ ශුද්ධවූ / වණ කැළැල් පස බලා,
ඔබවහන්සේගේ කුරුසය හා අති උග්‍රවූ / දුඃඛප්‍රාප්තිය බලා,
ඔබවහන්සේගේ ශ්‍රී භරිත / මළඉපදීම බලා (ඔබවහන්සේගේ මහිමාන්විත / උත්ථානය බලා),
ඔබවහන්සේගේ විස්මපත්වූ / අහස් නැගීම (ස්වර්ගාරෝහණය) බලා,
අභිවෘද්ධිදායක ස්ප්‍රීතු සාන්තු තුමන්ගේ / ආගතය බලා (සැනසිලිදායක ස්ප්‍රීතු සාන්තු වහන්සේගේ / ආගමනය බලා),
පහත කොටස් සඳහා පිළිතුරු පදය:
ඔබවහන්සේට කරන යාච්ඤා / අසා වදාළ මැනව
නඩුතීන්දු / දිනයේදී,
පවුකාර වූ / අප,
මරිය මග්දලේනාගේ පව් ක්ෂමාකොට, දකුණේ උන් සොරාගේ ප්‍රාර්ථනාව ඇසුවාවූ / ඔබවහන්සේ,
පෙර නිර්මිතයන් උපකාර වශයෙන් ගළවාගන්නාවූ / ඔබවහන්සේ,
මරණයෙහි හා අපායෙහි යතුරු ඇති / ඔබවහන්සේ,
අපේ මව්පිය නෑ සහෝදරයන් හා, උපකාර කාරයන් නිරාදුකින් ගළවා / වදාරණ පිණිස,
මළාවූ ක්‍රිස්තියානිවරුන් අනන්ත දඬුවමින් ගළවා / වදාරණ පිණිස,
මෙලොවෙහි කිසි පිහිටක් නැති ආත්මවලට දයාබරකම් කර / වදාරණ පිණිස,
මෙකී සෑම අයටත් නොකී අයටත් පවුත් දඬුවමුත් ක්ෂමාකර / වදාරණ පිණිස,
ඔවුන්ගේ අදහස් සම්පූර්ණකර දෙවා / වදාරණ පිණිස,
මෝක්ෂවාසිවරුන්ගේ සමූහයට ඔවුන් එක් කර / වදාරණ පිණිස,
භ්‍රාන්තික මහිමතාව ඇති / රජාණනි,
දෙවිඳාණන්ගේ / පුත්‍රයාණනි,
ලෝක පාපවල් හරින දේවාජබාලක වූ / ජේසුනි,
ඔවුන්ට නිත්‍ය සැතපීම දෙවා / වදාරණවා සොඳේ
ලෝක පාපවල් හරින දේවාජබාලක වූ / ජේසුනි,
ඔවුන්ට නිත්‍ය සුව සන්තර්පණය දෙවා / වදාරණවා සොඳේ
ලෝක පාපවල් හරින දේවාජබාලක වූ / ජේසුනි,
ඔවුන්ට නිත්‍ය සන්තර්පණය දෙවා / වදාරණවා සොඳේ
ක්‍රිස්තුනි අපේ ප්‍රාර්ථනා / අසා වදාළ මැනව
ක්‍රිස්තුනි අපේ ප්‍රාර්ථනා / අසා වදාළ මැනව
ක්‍රිස්තුනි අපේ ප්‍රාර්ථනා / ගිවිස වදාළ මැනව
ක්‍රිස්තුනි අපේ ප්‍රාර්ථනා / ගිවිස වදාළ මැනව
සියලුදෙනාම එක්වරක්: ස්වාමිනි ඔවුන්ට / කරුණාකළ මැනව
සියලුදෙනාම එක්වරක්: ක්‍රිස්තුනි ඔවුන්ට / කරුණාකළ මැනව
සියලුදෙනාම එක්වරක්: ස්වාමිනි ඔවුන්ට / කරුණාකළ මැනව
(සියලුදෙනාම)
පරමණ්ඩලවල වැඩ සිටින අපගේ පියාණනි, ඔබවහන්සේගේ ශ්‍රී නාමය ආරාධිත වේවා. ඔබවහන්සේගේ රාජ්‍යය පැමිණේවා. ඔබවහන්සේගේ කැමැත්ත පරමණ්ඩලයෙහි මෙන් මෙලොවෙහි ද ඉටුවේවා. අපගේ එදිනෙදා භෝජනය අද අපට දානය කළ මැනව. අපට වරද කරන අයගේ වැරදි අප කමා කරන්නාක් මෙන් අපගේ වැරදිද කමා කළ මැනව. පාප අවස්ථාවන්ට අසුවීමට අපට ඉඩ නොදී අයහපතින් අප මුදා ගත මැනව
සියලුදෙනාම එක්වරක්: අපාය දොරටුවෙන්, ඔවුන්ගේ ආත්ම ගළවනවා සොඳේ / ස්වාමිනි
සියලුදෙනාම එක්වරක්: ස්වාමිනි අපේ ප්‍රාර්ථනා / ඇසුව මැනව
සියලුදෙනාම එක්වරක්: අපේ හඬ ශබ්දය ඔබවහන්සේට / හේතු වුව මැනව
මූලිකයා:
යාච්ඤා කරම්හ
ස්වාමි දරුවෙනි / ඔබවහන්සේගේ දැසි දැස්සන්ගේ ආත්මවලට / අනන්ත දයාබරකම් / පෑව මැනව. / ඔවුන් විශ්වාසව අදහස් කර සිටිය දේ / ඔවුන්ට සැමකල් / සඵල වේවා! /
මෙකීදේ අපගේ ස්වාමි වූ / ජේසුස් ක්‍රිස්තුස් වහන්සේ උදෙසාම / අපට ලැබේවා /
සියලුදෙනාම: ආමෙන්
ප්‍රාර්ථනාව එක්කෙනෙක් හෝ කිහිපදෙනෙක් උදෙසා කියන ලද්දේ වී නම් අවසන් කරන ආකාරය:
ඔවුන්ට නිත්‍ය සැතපීම දෙවා වදාළ මැනව / ස්වාමිනි
නිත්‍යාලෝකය ඔවුන් පිට / බැබළුව මැනව
ඔවුන් සමාදානයේ / සැතපෙන ලද්දේවා
ආමෙන්
ඔවුන්ගේ ආත්මයන් ද, මළාවූ සියලු විශ්වාසිකයන්ගේ ආත්මයන් ද, දෙවියන් වහන්සේගේ දයාවෙන් සමාදානයේ / සැතපෙන ලද්දේවා
ආමෙන්
ප්‍රාර්ථනාව පොදුවේ මළාවූ සියලුදෙනා උදෙසා කියන ලද්දේ වී නම් අවසන් කරන ආකාරය:
ඔවුන්ට නිත්‍ය සැතපීම දෙවා වදාළ මැනව / ස්වාමිනි
නිත්‍යාලෝකය ඔවුන් පිට / බැබළුව මැනව
ඔවුන් දෙවියන් වහන්සේගේ දයාවෙන් සමාදානයේ / සැතපෙන ලද්දේවා
ආමෙන්
සටහන : Supun Lahiru Fernando